Lurraren zaintzatik ikasten: abian da “Lurzorua” programa
ENEEK-Ekolurrak “Lurzorua” hezkuntza programak beste ikasturte bati ekin dio, ortugintza ekologikoa oinarri hartuta ikasleen artean elikadura eta ingurumenarekiko kontzientzia sustatzeko helburuarekin.
2017an sortu zen, ENEEK-Ekolurraren ekimenez eta Amorebieta-Etxanoko Udalarekin elkarlanean. Proiektuaren abiapuntuan Neiker-Teknaliako Mikrobiologia eta Edafologia Departamentuaren ekarpen zientifikoa dago, eta bertako adituek Nekazaritza Ekosistemen Osasun Txartelak egokitzen lagundu zuten ikasleen erabilerarako.
“Lurzorua” programak ikasgelatik haratago doan ikuspegi pedagogikoa eskaintzen du: lurra ez da soilik bizitzaren oinarri, baizik eta ikaskuntza integralerako tresna. Biologia, geologia, matematika, fisika, nutrizioa eta baita etnografia ere lantzen dira jardueren bidez, ikuspegi diziplina anitzeko batetik.
Nekazaritzarako erabil daitekeen lurzoru emankorra oso mugatua dela erakusten da eta horri esker ikasleek ulertzen dute lurzoruaren erabilera arduratsua eta jasangarria funtsezkoa dela etorkizun emankor baterako.
Lurra, baliabide didaktikoa
Jarduera ENEEK-Ekolurraren Jauregibarria egoitzan hasten da harrerarekin eta nekazaritza ekologikoaren sarrerarekin, eta ondoren ikasleak Ibarra baserriko baratze profesionalera hurbiltzen dira tokiko nekazariarekin lur-laginak bildu eta ortugintzaren errutinak zein lurraren osasunerako gakoak bertatik bertara ezagutzeko. Jarraian egoitzara itzuli eta, baliabide interaktiboak erabiltzeaz gain, jasotako laginen laborategiko analisia egiten dute ondorioak ateratzeko, azkenik ikastetxean sakontzeko txostena osatuz.
Hezkuntza-programaren arrakasta
Hasiera batean Amorebieta-Etxanoko ikastetxeei soilik zuzendua bazen ere, lehen urteko arrakastaren ostean Euskal Autonomia Erkidego osora zabaldu zen. Ordutik hona, 4.500 ikasletik gora igaro dira programatik, eta hezkuntza-komunitatearen erantzuna “oso positiboa” izan dela diote antolatzaileek. 2026-2027 ikasturterako plaza guztiak beteta daude dagoeneko.
ENEEK-Ekolurrako komunikazio-teknikariak nabarmendu duenez, eskola-komunitatea “lehentasunezko kolektiboa” da elikadura ekologikoaren inguruko informazioa zabaltzeko, izan ere, gaurko ikasleak biharko ekoizle eta kontsumitzaileak izango dira.
ENEEK-Ekolurrarekin harremanetan jartzeko:
946271594
info@ekolurra.eus
www.ekolurra.eus
